ئەندامی دەستەی کارگێڕی مەکتەبی سیاسی یەکێتیی نیشتمانی کوردستان لەبارەی پەسەندکردنی بودجەوە لە پەرلەمانی عێراق ڕایگەیاند، ئەوەی شاندی هەرێم بە سەرۆکایەتی قوباد تاڵەبانی کردی زیندووکردنەوەی ڕۆحی متمانەیی و کاری پێکەوەیی بوو لە نێوان عێراق و هەرێمدا.
شاناز ئیبراهیم ئەحمەد، لەبارەی پەسەندکردنی بودجەوە ڕایگەیاندووە، ” چۆن نەخۆشکەوتن و دوورکەوتنەوەی سەرۆک مام جەلال لەگۆڕەپانی سیاسی عێراق ، بوو بەخاڵی دەستپێکی ناکۆکییەکانی نێوان حکومەتی فیدڕالی و حکومەتی هەرێمی کوردستان ، دەکرێت هەرواش پرۆسەی ئامادەکردن و پەسەندکردنی پڕۆژە یاسای بودجەی عێراق و جێگیرکردنی پشکی کوردیش لەبودجەدا ببێت بە خاڵی وەرچەرخانێکی گرنگ و دەسپێکی قۆناغی پێداچوونەوە و ئاسایی کردنەوەی پەیوەندییەکانی نێوان هەرێم و بەغداد “.
ئەندامی دەستەی کارگێڕی مەکتەبی سیاسی یەکێتیی نیشتمانی کوردستان نوسیویەتی، ” گرنگی سەرکەوتنی پرۆسەکە تەنها لەئاڵوگۆڕی نەوت و پارەدا نیە ، بەڵکو لەزیندووکردنەوەی ڕوحی متمانە و کاری پێکەوەییدایە کە مام جەلال لەبەغدادەوە ڕابەرایەتی دەکرد و سەرکەوتنی ئەم پرۆسەیەی ئێستا (قوباد تاڵەبانییە ، بەسیاسەتی حەکیمانەی سەرۆک مام جەلال) ، سەرباری ئاڵۆزی پرۆسەکە هەڵمەتی دژایەتیکردن و دروستکردنی ئاستەنگ و ڕێگرییەکان لەبەردەم قوباد تاڵەبانیدا کەم نەبوون ، بەڵام مکوڕی و پشوو درێژی قوباد تاڵەبانی هەم شکستی بەو هەوڵانە هێنا”.
لە درێژەی قسەکانیدا شاناز ئیبراهیم ئەحمەد ئاماژەی بەوەشکردووە، ” قوباد تاڵەبانی سەرکێشییەکی گەورەی ئەنجامدا و بەپێداگری و پشوودرێژییەوە گوێی بەتانە و تەشەر و پاشقولی هیچ کەسێک نەدا و مام جەلال ئاسا شانیدایە بەر بەرپرسیارییەتی و لەکۆتایشدا بەسەرکەوتن و سەربەرزییەوە لێی دەرچوو و لەگەشل ئەوەش ئومێد دەکەم حکومەتی هەرێمی کوردستان و حکومەتی فیدڕالی و تەواوی لایەنە سیاسییەکان (دەرس لەهەڵەکانی ڕابردوو وەربگرن)”.
