ڕێكخراوی مافی مرۆڤ ڕایدەگەیەنێت، لە مانگی ڕابردوودا لانیكەم 15 كۆڵبەر و كاسبكار لە سنوورەكانی كوردستان كوژراون یان برینداربوون.
ڕێكخراوی مافی مرۆڤی هەنگاو ئەمڕۆ پێنجشەممە 1ی نیسان بڵاویكردەوە، 80%ی ئەو حاڵەتانەی مانگی ئازار بە تەقەی ڕاستەوخۆی هێزە چەکدارەکانی ئێران بووە.
ڕونیشیدەكاتەوە، لەو ماوەیەدا سێ کۆڵبەر کوژراون و 12 کۆڵبەریش برینداربوون.
ڕێكخراوەكە دەشڵێت، “یەکێک لە کۆڵبەرەکان لەژێر ئەشکەنجەی هێزە چەکدارەکانی تورکیادا گیانی لەدەستداوە”.
ئاماژەشدەدات، زیاترین ژمارەی کوژران و بریندار لە پارێزگاکانی سنە و کرماشان بووە هەر یەكێكیان شەش حاڵەت بووە، سەرجەم کوژراوەکانیش خەڵکی پارێزگای ئورمیە بوون.
چۆنیەتی ڕوداوەكان:
تەقەی ڕاستەوخۆ: 12 حاڵەت (12 بریندار) کە دەکاتە 80٪ی کۆی حاڵەتەکان.
ڕوداوی سروشتی: دوو حاڵەت (دوو کوژراو) کە دەکاتەن 14٪ی کۆی حاڵەتەکان.
لێدان و کوتانی هێزە چەکدارەکان: یەك حاڵەت (یەك کوژراو) کە دەکاتە 6٪ی کۆی حاڵەتەکان.
