مادەی 11ی پرۆژەیاسای بودجەی گشتیی عێراق كە تایبەتە بە پشكی هەرێمی كوردستان و پابەندییەكانی لەلایەن ئەنجومەنی نوێنەرانەوە پەسەندكرا.
پاش نیوەڕۆی ئەمڕۆ چوارشەممە 31ی ئازار دانیشتنی ئەنجومەنی نوێنەرانی عێراق بۆ دەنگدان لەسەر پرۆژەیاسای بودجەی گشتیی ساڵی 2021 دەستیپێكرد.
پەرلەمانتاران دەنگیان بە مادەی یەكەمی پرۆژەیاساكەدا كە تیایدا نرخی بەرمیلێك نەوت بە 42 دۆلار و نرخی ئاڵوگۆڕی دۆلار-یش بە 1450 دینار بۆ هەر دۆلارێك دیاریكراوە.
لە درێژەی دانیشتنەكەی ئەنجومەنی نوێنەراندا هەردوو مادەی 10 و 11 پەسەندكران، كە مادەی 11 تایبەتە بە پشكی هەرێمی كوردستان لە بودجە و پابەندییەكانی هەرێم.
بەپێی دوایین ئەو گۆڕانكارییانەی بەسەر پرۆژەیاساكەدا هێنراوە پشكی هەرێمی كوردستان لە بودجەی گشتیی عێراق نزیكەی 9 ترلیۆن و نیو دینار دەبێت، بەپێی ڕێژەی 12.67%ی كۆی گشتیی بودجە.
