پۆلیسی دهۆک ئاشکرایکرد، ئێوارەی دوێنێ 11 ی ئازار، تەرمی گەنجێک لە باخەکەی ماڵی خۆیاندا دۆزراوەتەوە و دوای لێکۆڵینەوە دەرکەوتووە فیشەکێکی کڵاشنکۆفی بە جەستەیەوە بووە.
پۆلیسی دهۆک لەبارەی ڕوداوەکەوە ئاشکرایکردووە، “دوای ئەوەی زانیاریمان پێگەیشت کە گەنجێکی تەمەن 28 ساڵ گیانی لە دەستداوە، تەرمەکەی گواستراوەتەوە بۆ پزیشیکی دادوەری دهۆک و لەوێ دەرکەوتووە ئاسەواری فیشەکێکی پێوەیە”.
گەنجەکە ناوی (دیار یونس حەیدەر) بووە و تەمەنی 28 ساڵە، لە گوندەکەی خۆیان بەناوی “ئیمینکی”ە لە ناحیەی زاویتە.
وەک کەسوکاری گەنجەکە ئاماژەی پێدەکەن کە کێشەیان لەگەڵ کەسدا نەبووە و دیار لە کۆمپانیایەکی دەرهێنانی نەوت کاریکردووە.
