گەڕانەوەی خوان لاپۆرتا بۆ پۆستی سەرۆکی یانەی بەرشلۆنە، جەنگێکی کارگێڕی و دارایی گەورە لە نێوانی و فلۆرنتینۆ پێرێزی سەرۆکی یانەی ڕیاڵ مەدرید بەرپادەکات.
ڕۆژنامەی ئاسی ئیسپانی نوسیویەتی، کە گەڕانەوەی لاپۆرتا تەنها گەڕانەوەیەکی ئاسایی نابێت، بەڵکو ململانێیەکی دارایی و کارگێڕی گەورە لە نێوان یانە کەتەلۆنیەکە و یانەی ڕیاڵ مەدرید دروستدەکات.
بەپێی سەرچاوەکە، فلۆرنتینۆ پێرێزی سەرۆکی یانەی ڕیاڵ مەدرید پێشوەخت دەستی بە دانوستاندن بۆ گواستنەوەی داڤید ئالابای بەرگریکاری یانەی بایرن میونشن و ئێرلینگ هالاندی هێرشبەری یانەی بوروسیا دۆرتمۆند کردووە، بەڵام لە دوای گەڕانەوەی لاپۆرتا هاوکێشەکە ئاڵۆز دەبێت.
ئاس نوسیویەتی، لاپۆرتا هاوشێوەی پێرێز خەون بە هەمان دوو یاریزانەوە دەبینێت، لەگەڵ ستافە نوێیەکەی پلانیان داڕشتووە داوای گواستنەوەیان بکەن، ئەوەش لە بەرژەوەندیەکانی یانەی شاهانە دەدات و بەهۆیەوە ململانێیەکی قورس بەرپادەبێت.
ئالابا لەلایەن چەندین یانەوە داواکراوە لە نێوانیاندا ڕیاڵ مەدرید و بەرشلۆنە، بەوپێیەی لە کۆتایی وەرزدا گرێبەستەکەی لە بایرن کۆتاییدێت گواستنەوەی بۆ هەر یانەیەکی دیکە دەبێتە بێبەرانبەر، هەروەها هالاند داواکراوی چەندین یانەی گەورەی دیکەیە لە نموونەی مانچستەر سیتی و یونایتد.
