ئەنجومەنی وەزیرانی هەرێمی کوردستان دەربارەی میکانیزمەکانی دابەشکردنی موچە، هەڵکشانی ژمارەی توشبووانی کۆرۆنا و پێشنیاری قەدەغەی هاتوچۆ و دەستپێکردنەوەی گفتوگۆ لەگەڵ بەغداد لە کۆبوونەوەدایە.
بەپێی زانیارییەکان لە کۆبوونەوەکەدا ژمارەیەک تەوەر گفتوگۆیان لەبارەوە دەکرێت لەوانە، موچە و میکانیزمەکان بۆ دابەشکردنی، هەڵکشانی ژمارەی توشبووانی کۆرۆنا و توندکردنەوەی ڕێگاکانی خۆپارێزی و تاووتوێکردنی ئەو پێشنیازانە دەکرێت بۆ دووبارە ڕاگەیاندنی قەدەغەی هاتوچۆ.
هەروەها گفتوگۆ دەکرێت سەبارەت بە گەڕانەوەی شاندی هەرێمی کوردستان بۆ بەغداد کە بڕیارە هەفتەی داهاتوو شاندی دانوستانکار جارێکی دیکە بچێتەوە بەغداد.
تەوەرێكی دیكەی گفتوگۆكان، هەنگاوەکانی جێبەجێکردنی یاسای چاکسازی و ئەو قۆناغانەیە كە تا ئێستا جێبەجێکراون و تەواوکردنی ئەو ڕاپۆرتەی کە بڕیارە بنێدرێتە پەرلەمان لەسەر هەنگاوەکانی جێبەجێکردنی یاساکە.
