وتەبێژی پۆلیسی ڕاپەڕین ئاشکرایکرد تا ئێستاش لێکۆڵینەوە و وەرگرتنی وتە لە سکاڵاکارانی دۆسییەی سلێمان هەڵشۆیی بەردەوامە و تا ئێستا 300 کەس وەک سکاڵاکار وتەیان لێوەرگیراوە.
شۆرش ئیسماعیل، وتەبێژی پۆلیسی ڕاپەڕین بە تۆڕی میدیایی ئێستای ڕاگەیاند، “لە سەرەتای دۆسییەکەوە 52 کەس دەستگیرکرابوون کە تۆمەتباربوون لەو پرسەدا و لەو ژمارەیان 30 کەسیان ماوەتەوە”.
بە وتەی وتەبێژی پۆلیسی ڕاپەڕین، تا ئێستا 22 کەس بە کەفالەت ئازادکراون کە پێشتر وەک تۆمەتبار لە دۆسییەی سلێمان هەڵشۆییدا دەستگیرکرابوون.
دوای دەستگیرکردنی سلێمان هەڵشۆیی هەزاران هاوڵاتیی سکاڵایان لەسەر ئەو کەسە تۆمارکردبوو و ڕایانگەیاندبوو کە پارەیان داوە بەو کەسە و نەیداونەتەوە.
کۆتایی ساڵی ڕابردوو کەسێکیان بەناوی “سلێمان هەڵۆشیی” دەستگیرکرد کە مامەڵەی جیاوازی بە پارە و پارچە زەویی و ئۆتۆمبیل و زێڕی هاوڵاتییانەوە کردبوو، دواتر ڕاگەیەندرا کە 50 ملیۆن دۆلاری هاوڵاتییانی لایە و نەیداوەتەوە.
