نەوزەر ئازادی، ئەو هونەرمەندە کوردەی لە 60 کانی سەدەی ڕابردوو ڕۆڵێکی بەرچاوی هەبوو لە کۆمیدیای کوردی و ئێرانیدا.
نەوزەر ئازادی لە ساڵی 1939 لە کرماشان لە ڕۆژهەڵاتی کوردستان لە دایکبووە و تا پێش شۆڕشی ئیسلامی لە ئێران هەمیشە بە دەموچاوێکی شادی ئامێز و کۆمیدی لە بەرنامە و ئاهەنگەکاندا دەناسرا.
ئەمڕۆ 18 ی شوبات، نەوزەر ئازادی لە تەمەنی 82 ساڵیدا لە ئەڵمانیا کۆچی دوایکرد، دوای ئەوەی بۆ ماوەیەک لە نەخۆشخانە مابوویەوە.
نەوزەر کەسایەتییەکی کۆمیدی بوو کە لەسەر ئاستی ئێران ناسرابوو و هەمیشە بەرنامە و ئاهەنگەکانی بینەرێکی زۆری پڕ لە شادی و پێکەنینی هەبوو.
ئازادی، کارە هونەرییە کۆمیدییەکانی زیاتر فارسی بوون و بە زمانی کوردیش چەند کارێکی هەیە، ئەو لە دوای ساڵی 1979 یەکێک بوو لەو هونەرمەندە ئێرانییانەی کە ئێرانی بەجێهێشت و لە غەریبیدا سەرینایەوە.
ئەو هونەرمەندە کوردە ڕۆڵێکی گەورەی هەبوو لە ناساندنی گۆڕانی و میوزکی کوردی بە هونەرمەندە فارس زمانەکانی سەردەمی خۆی.
