پاش بەردەوامیی خۆپیشاندانەكانی ناسڕیە كە قوربانییان بەدواداهاتووە، بۆ پاڵپشتیی خۆپیشاندەرانی ئەو شارە لە بەغدادی پایتەختی عێراق دەیان كەس گردبوونەوە.
چەند سەرچاوەیەك بە میدیاكانی عێراقیان وتووە، ئەمشەو 27ی شوبات، دەیان خۆپیشاندەر ڕویان لە گۆڕەپانی عەدن لە باكووری بەغداد كردووە، وەك پاڵپشتییەك بۆ خۆپیشاندانەكانی شاری ناسڕیە و پارێزگای زیقار.
هەریەك لە پارێزگاكانی كەربەلا و بابل و واست و دیوانیە وەك پاڵپشتییەك لە خۆپیشاندەرانی ناسڕیە ئەمڕۆ ڕژانە سەر شەقام.
بەگوێرەی زانیاریی میدیا عێراقییەكان، شەش ڕۆژە خۆپیشاندان لە ناسڕیە ناوەندی پارێزگای زیقار بەردەوامی هەیەوە بەهۆیەوە تا ئێستا نۆ كەس گیانیان لەدەستداوە و دەیانی دیكەش بریندار بوون.
هەرچەندە، مستەفا كازمی، سەرۆكوەزیرانی عێراق بڕیاریدا بە گۆڕینی پارێزگاری زیقار كە داواكاریی خۆپیشاندەرانی ئەو پارێزگایە بوو، بەڵام ئەو هەنگاوە هیچی لە توڕەیی خۆپیشاندەران كەمنەكردەوە.
