سەرۆكی ئەمریكا ئەمڕۆ دووشەممە 5ی تشرینی یەكەم ڕایگەیاند، ئەمڕۆ نەخۆشخانە جێدەهێڵێت و داواشدەكات ڕێگەنەدرێت كۆرۆنا كۆنتڕۆڵی ژیان بكات.
دۆناڵد ترەمپ، سەرۆكی ئەمریكا ڕایگەیاند، ئەمڕۆ كاتژمێر 6:30 بە كاتی ناوخۆی وڵاتەكەی نەخۆشخانەی سەربازیى (واڵتەر رید)، كە چارەسەرى ڤایرۆسى كۆرۆناى تێدا وەردەگرت، جێدەهێڵێت.
ترەمپ، لە تویتەری خۆیەوە داوای نەترسان لە ڤایرۆسی كۆرۆنا و ڕێگەپێنەدانی بۆ كۆنتڕۆڵكردنی ژیانی خەڵكیشی كرد.
سەرۆكی ئەمریكا دەشڵێت، لەژێر سایەی ئیدارەكەیدا زۆرێك دەرمان و زانیاری گەورە هەن و دەربارەی دۆخی تەندروستی خۆیشی نوسیویەتی، “له 20 ساڵ پێش ئێستا زیاتر هه‌ست به باشی ده‌كه‌م”.
هەینی ڕابردوو توشبوونی ترەمپ و میلانیای هاوسەری ڕاگەیەنرا، بەهۆیەوە سەرۆكی ئەمریكا ڕەوانەی نەخۆشخانە كرا.
