سەرچاوەیەک لە ناو حەشدی شەعبیدا بە ناوەندی دەنگ و ڕەنگی کۆماری ئیسلامی ئێرانی ڕاگەیاندووە، دوای هێرشەکانی ئەمریکا لە سوریا دژی حەشدی شەعبی لە خاکی عێراقیش فڕۆکەی ئەمریکی چاودێری بنکەکانی حەشدی شەعبی دەکات.
ئەو سەرچاوەیە ئاشکرایکردووە، “ئەمڕۆ 26 ی شوبات، چەند فڕۆکەیەکی هەواڵگری ئەمریکی بەسەر بنکە و بارەگاکانی حەشدی شەعبی لە نزیک فەلوجە سوڕاوەتەوە و چاودێری کردوون”.
بەپێی زانیارییەکانی سەرچاوەکە فڕۆکە هەواڵگیرییەکان لە نزیک شاری فەلوجە لە ناوچەی عامرییە چەندجارێک بیندراون و چاودێری چەند بنکەیەکی حەشدی شەعبیان کردووە.
ئاژانسە هەواڵییە ئێرانییەکە ئاشکرای دەکات لە ناوچەی جرف النصر-یش بەهەمان شێوە چاودێری بنکەکانی حەشدی شەعبی کراوە لەلایەن فڕۆکەی بێ فڕۆکەوانی ئەمریکییەوە.
دوای دووهێرش بۆسەر ناوەندە سەربازییەکانی ئەمریکا لە شاری هەولێر و ناوچەی سەوزی بەغداد، ئەمریکا وەڵامی هێرشەکانیدایەوە و چەند بنکەیەکی “کەتائیبی حزبوڵا و کەتائیبی سەیدولشوهەدا” ی کردە ئامانج.
دوای بۆردومانەکە وەزارەتی دەرەوەی ئەمریکا ئاشکرایکرد کە هێرشەکان بە فەرمانی جۆبایدنی سەرۆکی ئەمریکا و بە ئاگاداری هەواڵگیری عێراقی ئەنجامدراوە.
