لەسەر ڕاگرتنی ئۆتۆمبێل لەنێوان دوو دراوسێ لە گەڕەكێكی شاری هەولێر، شەڕەتەقە دروست بوو، پۆلیس چووەتە شوێنی ڕوداوەكە و “كەسێكیش بریندار بووە”.
ئەمرۆ چوارشەممە 24ی شوبات، پۆلیسی هەولێر لە ڕاگەیەندراوێكدا ئاشكرایكردووە، “بەشی پۆلیسی فریاکەوتنی هەولێر، پاش ئەوەی بە بوونی شەڕەتەقەیەک لەنێوان دوو دراوسێدا لە گەڕەکی (كوران) ئاگادار کرانەوە، دەستبەجێ گەیشتنە شوێنی ڕوداوەکە”.
پۆلیس ئاماژەی بەوەشكردووە، “دەرکەوتووە کەوا کێشەکە لەسەر ڕاگرتنی ئۆتۆمبێل بووە، کە کەسێک بە ناوی (ع.م.ح) پیشە کاسب، بە چەكی جۆری كڵاشنكۆف تەقەی کردووە و کەسێکی بە ناوی (سەردار ڕەسوڵ عوسمان) بریندار کردووە”.
تەقەکەرەکە لەلایەن پۆلیسی فریاکەوتنەوە دەستگیر کراوە و ڕادەستی بنکەی پۆلیسی کوردستان کرا، وەك لە پۆلیسی هەولێر ئاماژەی پێكردووە.
