بانكی ڕەشید، دابەشكردنی موچەی مانگی شوباتی فەرمانبەران و خانەنشینانی عێراقی دەستپێكرد.
ئەمڕۆ دووشەممە 22ی شوبات، بانكی ڕەشید لە ڕاگەیەندراوێكدا ئاشكرایكرد، “پارەی پێویست بۆ دابەشكردنی موچە گەیشتووەتە بانكەكە و دابەشكردن موچەی مانگی شوباتی فەرمانبەران دەستیپێكردووە.”
بانكی ڕەشید داوا لە هەموو فەرمانبەران دەكات موچەكانیان وەربگرن و هەركات كورتەنامەی گەیشتنی موچەكانیان پێگەیشت، سەردانی ناوەندە ئەلیكترۆنییەكانی دابەشكردنی موچە و لقەكانی بانقی ڕەشید بكەن.
دوێنێ یەكشەممە 21ی شوبات، وەزارەتی دارایی عێراق ڕاگەیەندراوێكی بڵاوكردەوە و ڕایگەیاند، “نووسراومان ئاڕاستەی فەرمانگەی ژمێریاری كردووە بۆ دەستپێكردنەوەی كاری تایبەت بە دابەشكردنی موچە.”
ڕوونیشیكردەوە كە مەبەست لەو كارانە، “ئامادەكردنی لیستی موچەی مانگی شوباتی فەرمانبەران و خانەنشینان و پارەداركردنی پرۆسەكەیە بۆ ئەوەی دەست بە دابەشكردنی موچە بكرێت.”
حكومەتی عێراق دابەشكردنی موچەی فەرمانبەران و خانەنشینانی كردووە بە ئەلیكترۆنی، مانگانە هەر موچەخۆرێك لەڕێگەی كورتەنامەوە ئاگاداردەكرێتەوە لە هاتنی موچەكەی و بۆ ئەو مەبەستەش سەردانی بنكە و ناوەندە ئەلیكترۆنییەكانی دابەشكردنی موچە دەكات كە لە زۆربەی گەڕەكەكانی شارەكاندا هەن و تا درەنگانی شەو كاردەكەن، بەوەش پێویست ناكات موچەخۆر سەردانی بانكەكان بكات و تەنها لە كاتەكانی ڕۆژدا موچە وەربگرێت.
