کۆمپانیای گەشتی ئاسمانیی ئەمریکا لە دوای ڕوداوەکەی دوێنێی شاری دێنیڤەر لە ویلایەتی کۆلۆرادۆ لەو وڵاتە، گەشتی فڕۆکەکانی بوینگی 777 ڕادەگرێت.
دوێنێ لە فڕینی ژمارە 328 ی کۆمپانیای گەشتی ئاسمانیی ئەمریکا بەهۆکاری کێشەی تەکنیکی فڕۆکەیەکی جۆری بوینگی 777 بە 231 سەرنشین و 10 کارکەری فڕۆکەکەوە یەکێک لە مەکینەکانی سوتا و بە ناچاری نیشتەوە.
دوای ئەو ڕوداوە دەستەی گەشتە ئاسمانییەکانی ئەمریکا داوای کردووە بەخێرایی لێکۆڵینەوە لە مەکینەکانی فڕۆکەی بیونگی 777 بکرێت و ئەو کێشەیەی بووەتە هۆی لەکار کەوتنی مەکینەی فڕۆکەکە دیاری بکرێت.
لە ڕاگەیەندراوێکدا دەستەی گەشتە ئاسمانییەکانی ئەمریکا دەڵێت، “لێکۆڵینەوە سەرەتاییەکان نیشانیداوە کە یەکێک لەو پەڕانەی لەناو مەکینەی فڕۆکەکەدایە بە بنەوە شکاوە و دواتریش ئەوە بووەتە هۆی شکاندی پەڕەکانی دیکە”.
شکانی مەکینەی بوینگێکی 777 کاریگەری لەسەر پشکی کۆمپانیاکە کردووە و هێناویەتییە خوارەوە، لەگەڵ ئەوەش بەشێک لە وڵاتان لەوانە ژاپۆن، داوایکردووە تا رونبوونەوەی هۆکارەکان ئەو کۆمپانیایانەی گەشتی ئەو وڵاتە دەکەن بوینگی 777 بەکار نەهێنن.
