حکومەتی ئێران بڕیاریداوە بە داخستنی سنورەکانی لەگەڵ هەرێمی کوردستان بۆ جوڵەی گەشتیاری و کۆمەڵگەی دەروازەی حاجی ئۆمەرانیش بڕیارەکە پشتڕاست دەکاتەوە.
لە ڕاگەیەندراوێکدا دەروازەی سنوری حاجی ئۆمەران ئاشکرایکردووە، ” ئاگاداری گشت هاوڵاتییان و گەشتیارانی خۆشەویست دەکەینەوە کە لایەن ئێرانی بە ڕێگای پەیوەندییەکانەوە ، ئاگاداری ئێمەیان کردووە کە حکومەتی ئێران بڕیاری داوە سبەی ڕۆژی یەک شەممە ڕێکەوتی (21/2/2021) کاتژمێر (2)ی پاش نیوەڕۆ دەروازەی نێودەوڵەتی حاجی ئۆمەران لە ڕووی گەشتیارییەوە بۆ ماوەی (2) دوو هەفتە دادەخەن”.
بەپێی زانیارییەکان جوڵەی گەشتیاری لەلایەن ئێرانەوە لەگەڵ هەرێمی کوردستان سنوردار دەکرێت و تەنها ڕێگە بەو کەسانە دەدرێت لە ئێرانن بگەڕێتەوە هەرێمی کوردستان.
ئەم هەوڵانەی ئێران لەکاتێکدا کە سەعید نەمەکی، وەزیری تەندروستیی ئێران ئەمڕۆ 20 ی شوبات ڕایگەیاندووە، “گومانیان هەیە لە عێراقەوە کۆرۆنا گۆڕاوەکە گوازرابێتەوە بۆ ئێران”.
ئەو بەرپرسە ئێرانییە ئاشکرایکردووە کە وڵاتەکەی پرسی بوونی کۆرۆنا گۆڕاوەکە لە عێراق بە جدی وەردەگرێت و چەند ڕێکارێک دەگرێتەبەر.
