شەوی ڕابردوو بە 14 موشەک کە “مینی کاتیۆشا” بوون هێرشکرایە سەر بنکەی سەربازی ئەمریکییەکان و چەند موشەکێکیش لەناو شاری هەولێر کەوتنەخوارەوە، بەپێی ئەو وێنانەی کە دژەتیرۆری کوردستان بڵاویکردووەتەوە داتا و نوسراوی سەر موشەکەکان ئاشکرا دەبێت.
موشەکەکان “مینی کاتیۆشا”ن و لە چەندین وڵاتی وەک ، میسر و تورکیا و ئەفریقای باشور و کۆریای باشور دروست دەکرێنەوە، ئەگەرچی دروستکراوی سەرەکی ڕوسیا و چینن.
سایتی “ئەلمەشریق” لەسەر ئەم جۆرە کاتیۆشایە پێشتر ڕاپۆرتێکی ئامادەکردووە و نوسیویەتی، “ئەم جۆرە کاتیۆشایە دروستکراوی ناوخۆی ئێرانە و لە کۆتایی سەدەی ڕابردوو ئەو وڵاتە دەستی بە دروستکردنی کردووە.
ئێران کۆمەڵەی موشەکەکانی “فەجری -1” ی هەیە کە ئەم کاتیۆشایەش لە چوارچێوەی ئەو کۆمەڵەیەدا دروست دەکرێت.
پێشتریش چەند سایتێکی ئیسرائیلی لەسەر هەمان موشەک ئەوەیان ئاشکرا کردووە کە دروستکراوی وڵاتی ئێرانن و لەوێوە بۆ عێراق و سوریا و لوبنان و فەڵەستین دەنێردرێت.
لەدوای هێرشکردنە سەر هەولێر گروپێکی چەکداری نزیک لە حەشدی شەعبی بەناوی “سریا اولیاء الدم” بەرپرسیارێتی خۆی لە هێرشەکە ڕاگەیاند.
ئەم گروپە خۆی وەک گروپێکی چەکداری شیعە ناساندووە و هەڕەشەی ئەوەی کردووە کە “ئەمە سەرەتای یارییەکەیە” لەگەڵ ئەمریکا و بەردەوام دەبن.
