بافڵ تاڵەبانی، هاوسەرۆکی یەکێتیی نیشتمانیی کوردستان، ڕاگەیەندراوێكی لەبارەی موشەكبارانەكەی شاری هەولێر بڵاوكردەوە و دەڵێت، “رووبەڕووی ھەر گرووپ و تاقمێک دەبینەوە کە ئاسایشی ھەرێم بخەنە مەترسییەوە.”
كەمێك لەمەوبەر، هاوسەرۆكی یەكێتی ڕاگەیەندراوێكی لەبارەی كەوتنەخوارەوەی چەند موشەكێك لە شاری هەولێر بڵاوكردەوە و ڕایگەیاند، “ئیدانەی ھەر پیلانێک دەکەین کە مەرامی تێکدانی ئارامیی ھەرێمی کوردستانی لەپشتەوە بێت و ھەموو ھەوڵێک دەدەین بۆ روبەڕوبوونەوەی ھەر گرووپ و تاقمێک کە ئاسایشی ھەرێم بخەنە مەترسییەوە.”
بافڵ تاڵەبانی، هاوسەرۆکی یەکێتیی نیشتمانیی کوردستان جەختدەكاتەوە كە “بە هیچ شێوەیەک رێگەنادەین ئاسایش و ئارامیی کۆمەڵانی خەڵک تێکبدرێت.” و لە ڕاگەیەندراوەكەدا دەڵێت، “دڵنیام بە یەکڕیزی و یەک ئیرادەیی ھێزە ئەمنییەکانمان، دەتوانین باشتر ڕووبەڕووی ئاڵنگارییە ئەمنییەکان ببینەوە و ژیانێکی باشتر و ئارامتر بۆ ھەمووان فەراھەمبکەین.”
دەقی ڕاگەیەندراوەكە:-
ئیدانەی ھەر پیلانێک دەکەین کە مەرامی تێکدانی ئارامیی ھەرێمی کوردستانی لەپشتەوە بێت و ھەموو ھەوڵێک دەدەین بۆ روبەڕوبوونەوەی ھەر گرووپ و تاقمێک کە ئاسایشی ھەرێم بخەنە مەترسییەوە. بە هیچ شێوەیەکیش رێگەنادەین ئاسایش و ئارامیی کۆمەڵانی خەڵک تێکبدرێت.
ئەو ھێرشانەی کرانە سەر شاری ھەولێر مایەی نیگەرانیمانە، ھیوای زووچاکبوونەوە بۆ برینداران دەخوازین و دڵنیام بە یەکڕیزی و یەک ئیرادەیی ھێزە ئەمنییەکانمان، دەتوانین باشتر ڕووبەڕووی ئاڵنگارییە ئەمنییەکان ببینەوە و ژیانێکی باشتر و ئارامتر بۆ ھەمووان فەراھەمبکەین.
بافڵ تاڵەبانی
هاوسەرۆکی یەکێتیی نیشتمانیی کوردستان
