کۆبوونەوەی یەکێتیی نیشتمانیی کوردستان و بزوتنەوەی گۆڕان، ئەمڕۆ یەکشەممە 29ی تشرینی دووەم، لە ماڵی مام جەلال لە دەباشان دەستیپێکرد و پرسی لامەرکەزیی سلێمانیش یەکێکە لە تەوەرە سەرەکییەکانی کۆبوونەوەکە.
بژار دەباغ، پەیامنێری تۆڕی میدیایی ئێستا لە شوێنی کۆبوونەوەکە ڕایگەیاند، کۆبوونەوەی ئەمڕۆ لەسەر ئاستی باڵایە و شاندی بزوتنەوەی گۆڕان بە سەرۆکایەتیی عومەری سەید عەلی ڕێکخەری گشتیی بزوتنەوەکە و ئەندامێتی عەدنان عوسمان، شەماڵ عەبدولوەفا، مامۆستا جەمال و دلێر عەبدولخالق پێکهاتبوون و لەلایەن هاوسەرۆکانی یەکێتی، بافڵ تاڵەبانی و لاهور شێخ جەنگییەوە پێشوازییان لێکرا.
کۆبوونەوەی ئەمڕۆ لەسەر دەستپێشخەری یەکێتی بووە، لە کۆبوونەوەکەدا یەکێتیی نیشتمانیی کوردستان و بزوتنەوەی گۆڕان پرسی لامەرکەزیی سلێمانی و پرسە ناوخۆییەکانی نێوانیان تاوتوێدەکەن.
بەپێی زانیارییەکانی تۆڕی میدیایی ئێستا یەکێکی دیکە لە تەوەرەکانی کۆبوونەوەکە پرسی دواکەوتنی موچە و نەناردنی بڕە پارەی هەرێمە لەلایەن بەغدادەوە.
ئەمە لەکاتێکدایە پێشتر یەکێتیی نیشتمانی کوردستان پاڵپشتی لە پرسی لامەرکەزی پارێزگاکان کردووە و بۆ ئەو مەبەستەش لەماوەی ڕابردوودا سەردانی لایەنەکانی دیکە لەناویشیاندا بزوتنەوەی گۆڕانی کردوە ، هەروەها لە ئەنجومەنی پارێزگای سلێمانی پرۆژەی لامەرکەزی ئامادەکرا و دەنگی لەسەردرا.
