خانەی قەیرانە تەندروستیەکانی عێراق ،ئەمڕۆ دووشەممە تەواوی چالاکییە وەرزشییەکانی لە باشوور و ناوەڕاستی عێراق ڕاگرت.
بەهۆی تەشەنەکردنی ڤایرۆسی کۆرۆنا و بەرزبوونەوەی ڕێژەی توشبووان لە سەرجەم شارەکانی عێراق، لیژنەی باڵا بۆ تەندروستی و سەلامەتی بە فەرمی سەرجەم چالاکیە وەرزشییەکانی ڕاگرت بە خولەکانی تۆپی پێشەوە.
لەم بارەیەوە ڕاگەیانراوێکیان بڵاوکردووەتەوە، تیایدا هاتووە، ” سەرجەم ئەو چالاکییانەی کۆبوونەوەی جەماوەری لێدەکەوێتەوە ڕادەگیرێن، پاڵپشت بە لێکدانەوەکانی لیژنەی باڵا بۆ تەندروستی و سەلامەتی نیشتیمانی، ئەمینداریەتی گشتی ئەنجومەنی وەزیرانی عێراق بڕیاری ڕاگرتنی سەرجەم چالاکیە وەرزشیەکانی خستووەتە بواری جێبەجێکردنەوە”.
لە ڕاگەیانراوەکەدا هاتووە، ” بڕیارەکە گشتییە و سەرجەم یارییەکان دەگرێتەوە، هیچ یەکێک لە وەرزشەکان لە بڕیارەکە بەدەرنابێت”.
شایەنی ئاماژە بۆکردنە، قۆناغی چوونی خولی نایابی عێراقی، دوێنێ یەکشەممە کۆتاییهات، بڕیاربوو 20ی شوبات کە هەینی داهاتوو دەکات قۆناغی دووەم و گەڕانەوەی وەرز دەستپێبکاتەوە، بەڵام بەهۆی بڕیارەکەوە وادەی دەستپێکردنەوەی چالاکیەکان بۆ کاتێکی نادیار دوادەکەوێت.
