لەماوەی سێ ڕۆژدا وێنەی جیاواز لە چیای گارە بڵاودەبێتەوە، کە لە دیوێکی شەڕەتۆپەڵە و ورچی تێدا ئازاد دەکرێت، لە دیوێکی دیکەی ڕوبەڕوبوونەوەی قورسی نێوان گەریلاکانی پەکەکە و سوپای تورکیایە.
زنجیرە چیای گارە بە دەیان کیلۆمەتر لە سنوری ڕۆژئاوای کوردستان و هەرێمی کوردستانەوە درێژ دەبێتەوە تا ئامێدی و لەوێشەوە تا دێرەلۆک و شیڵادزێ.
لەماوەی سێ ڕۆژدا لە وێنەکان لەسەر چیای گارە دوو دیوی جیاواز نیشان دەدەن، بەشێک لە وێنەکان وێنەی سەردانیکەرانی گەشتیارانە کە بۆ شەڕەتۆپەڵ چوون و بەشێکی دیکەیان پەیوەستبوون بە ئازادکردنی چەند ورچێک لەناو هەمان زنجیرە چیادا، لەلایەکی دیکەوە شەڕی نێوان گەریلاکانی پەکەکە و سوپای تورکیا بەردەوامی هەیە.
چیای گارە لە بەرزترین شوێندا یەک کیلۆمەتر و 816 مەتر بەرزە و بەفر لە هەندێک شوێنیدا بە درێژای ساڵ دەمێنێتەوە، لە وەرزی زستاندا تا 16 پلە لەژێر سفرەوە پلەی گەرمی دادەبەزێت و لە هاویندا تا 30 پلەی سیلیزی گەرم دەبێت.
ئێستا سوپای تورکیا لە ڕۆژی چوارشەممەوە 10 ی شوبات ئۆپەراسیۆنێکی بۆسەر چیاکە ڕاگەیاندووە و هێزەکانی پاراستنی گەل هەپەگە، کە باڵی سەربازی پەکەکەیە دەڵێت هێرشەکەی تێکشکاندووە و بە فڕۆکەی بێ فڕۆکەوان هێرشیکردووەتە سەر بنکەی مانەوەی سەربازانی سوپای تورکیا.
سوپای تورکیا دەڵێت، لە دوێنێوە چەندینجار بۆردوومانی ناوچەکەیان کردووە، هەر ئەمڕۆش فڕۆکەکان گوندەکانی سیانێ، ئەرگنێ، درێنی و ئیکمالێیان لە بناری چیای گارە بۆردوومان کردووە.
لە بەرامبەردا پەکەکە دەڵێت، ” فڕۆکە جەنگییەکانی تورکیا 18 جار چیای گارەیان بۆردوومان کردووە، “گەریلاش لە رێگەی فڕۆکەی بێفڕۆکەوانەوە ناهێڵن سوپای تورکیا پێشڕەوی بکات”.
