وەزیری بەرگریی هیندستان ئاشكرایكرد، لەگەڵ چیندا ڕێككەوتوون لەسەر كشانەوەی هێزەكانیان لە ناوچە كێشە لەسەرەكان لە ڕۆژئاوای هیمالایا.
پاش چەندین مانگ گرژی لە نێوانیاندا، ڕاجنات سینگ، وەزیری بەرگریی هیندستان ئەمڕۆ پێنجشەممە 11ی شوبات ڕایگەیاندووە، “چین و هیندستان ڕێككەوتوون لەسەر ئەوەی هێزەكانیان لە ناوچە كێشە لەسەرەكان بكشێننەوە لە ڕۆژئاوای هیمالایا”.
وەزیرە هیندییەكە ئاماژەی بەوەشكردووە، ئەو ڕێككەوتنە پاش چەندین گەڕی دانوستانی دێپلۆماسی و سەربازیی نێوان هەردوو وڵاتەكە هاتووەتە بەرهەم.
لای خۆشیەوە وەزارەتی بەرگریی وڵاتی چینیش لە ڕاگەیەندراوێكدا شەوی ڕابردوو ئاشكرایكرد، لەگەڵ هیندستاندا گەیشتوونەتە ڕێككەوتن بۆ كشانەوەی هێزەكانیان.
لە مانگی نیسانی ساڵی ڕابردووەوە، گرژی و ئاڵۆزی لەنێوان ئەو دوو وڵاتەدا هاتە ئاراوە، هۆكارەكەشی بۆ پێكدادانی سەربازی هات لە ناوچەی لاداخ لە ڕۆژئاوای هیمالایا، كە بە ناوچەیەكی كێشە لەسەر هەژمار دەكرێت.
