پەرلەمانتارێكی لیژنەی دارایی دەڵێت، زیادكردنی تەمەنی یاسایی خانەنشینبوون خواستی زۆرێك لە فەرمانبەرانە و پاڵپشتیی پەرلەمانیشی هەیە.
موعین كازمی، ئەندامی لیژنەی دارایی ئەنجومەنی نوێنەرانی عێراق رایگەیاند، هەمواری تەمەنی یاسایی خانەنشینبوون لە 60 ساڵەوە بۆ 63 ساڵ، وەك ئەوەی پێشتر كاری پێدەكرا بەر لە هەمواری یاسای خانەنشینیی كارپێكراوی ئێستا، خواستی ژمارەیەكی زۆری فەرمانبەرانە و شایستەیەكی سروشتییە.
وتیشی، “ئێمەش پێمانوایە فەرمانبەر لە تەمەنی 60 ساڵیدا دەتوانێت زیاتر ببەخشێت و، هاوسۆزییەكیش لەنێو ئەنجومەنی نوێنەران لەسەر بابەتەكە و خواست لەسەر هەمواری یاساكە هەیە”.
بەر لەوە پێویستە رای حكومەت وەربگیرێت تایبەت بە تێچووە داراییەكەی، لەكاتێكدا ئەگەر یاساكە هەمواربكرێت و تەمەنی یاسایی خانەنشینبوون بگەڕێندرێتەوە بۆ 63 ساڵ، بابەتەكە پێویستی بەوە هەماهەنگی لەگەڵ حكومەت بكرێت، كازمی وای وت.
باسی لەوەشكرد، بابەتەكە تەنها لە دەستی ئەنجومەنی نوێنەراندا نییە، بەڵكو حكومەتیش مافی هەیە تانە لەو یاسایانە بدات كە ئەرك و تێچووی داراییان هەیە، ئێمە پێشنیارەكەمان پێشكەشكردووە و لەگەڵ پەسەندكردنیداین.
