پیاوێك لە پارێزگای زیقار بەهۆی ئەوەی ڕێگری لێكردووە ژنی سێیەم بهێنێت، ژنی دووەمی خۆی لە ئۆتۆمبێلەكەی خستووەتە خوارەوە و بەو هۆیەوە گیانی لەدەستدا.
سەرچاوەیەكی ئەمنی لە پارێزگای زیقار ئەمڕۆ یەكشەممە 7ی شوبات، بە بەشێك لە میدیاكانی عێراقی ڕاگەیاندووە، “هاوڵاتییەكی پارێزگاكە كە لە پەنجاكانی تەمەنیایەتی، لە ڕێگایەكی خێرادا ژنی دووەمی خۆی لە ئۆتۆمبێلەكەیەوە فڕێداوەتە خوارەوە”.
سەبارەت بە هۆكاری پشت ئەو كارەی، سەرچاوەكە ئاشكرایكردووە، “ئەو ژنە هەوڵی داوە ڕێگری لە هاوسەرەكەی بكات ژنی سێیەم بهێنێت، لەكاتی دەمەقاڵێ لەناو ئۆتۆمبێلەكە هاوسەرەكەی لە ئۆتۆمبێلەكەوە فڕێی داوەتە خوارەوە”.
ڕوداوەكە پێش پێنج ڕۆژ ڕویداوە و بەهۆی سەختی برینەكەیەوە، ئەمڕۆ ژنەكە گیانی لەدەستداوە، وەك سەرچاوە ئەمنییەكە ئاشكرایكردووە.
ئەوەش خراوەتەڕوو، قوربانییەكە بەر لەوەی گیان لەدەستبدات سكاڵای لەسەر هاوسەرەكەی تۆماركردووە، دواتر بەپێی مادەی 405 لە یاسای سزادانی عێراقی پیاوەكە دەستگیر كراوە.
