عێراق.. “بانكی فەرمانبەران” بندیوار و دوو موچەكان ئاشكرادەكات

لەڕێگەی پرۆژەی “بانكی فەرمانبەران”ـەوە، عێراق كاردەكات بۆ ئاشكراكردنی بندیوارەكان و ئەوانەی زیاتر لە موچەیەكیان هەیە.

وەزارەتی پلاندانانی عێراق، مانگی حوزەیرانی داهاتووی وەك وادەیەك دیاریكردووە بۆ تەواوكردنی پرۆژەی “بانكی فەرمانبەران” بەمەبەستی زانینی ژمارەی ڕاستەقینەی فەرمانبەران و ئاشكراكردنی بندیوار و دوو موچەكان.

ئەمڕۆ یەكشەممە 7ی شوبات، ڕۆژنامەی سەباح كە زمانحاڵی حكومەتی عێراقە، لە زاری عەبدلزەهرە هنداوی، وتەبێژی وەزارەتی پلاندانانەوە بڵاویكردەوە، “ئەو وەزارەتە پرۆژەكەی دەستپێكردووە و بەردەوامە لە كاركردن تیایدا و هەوڵدەدات لە مانگی حوزەیراندا تەواوی بكات.”

بەگوێرەی زانیارییەكان، وەزارەتی پلاندانانی عێراق چەندین تیمی گەڕۆكی لە دەزگای ناوەندیی ئامار پێكهێناوە، ئەو تیمانە سەردانی فەرمانگە و دامەزراوەكانی دەوڵەت دەكەن و تا ئێستا ناوی زیاتر لە دوو ملیۆن فەرمانبەر تۆماركراون.

وتەبێژی وەزارەتی پلاندانان ئاشكرایكرد، “ئامانج لە پرۆژەی بانكەكە و سەرژمێرییەكە، ئاشكراكردنی بندیوار و ئەو فەرمانبەرانەیە كە دوو موچە یاخود زیاتر وەردەگرن، هەروەها ماوەی خزمەت و ئاستی خوێندن و چەندین زانیاریی تر لەو ڕێگەیەوە وەردەگیرێن.”

پێشتر عەلی عەلاوی، وەزیری دارایی عێراق ڕایگەیاندبوو، “زیاتر لە 10%ی فەرمانبەران بندیوار و خاوەنی دوو موچەن.”

بابەتی پێشتر

كوبا دەرگای زۆرینەی بەشە ئابورییەكان لەبەردەم كەرتی تایبەتدا واڵا دەكات

بابەتی دواتر

لیژنەی دارایی پەرلەمانی عێراق لەسەر گۆڕانکاری لە بودجەدا لەگەڵ کازمی کۆدەبێتەوە

بابەتی پەیوەندیدار
Total
1
Share