قوباد تاڵەبانی، جێگری سەرۆكوەزیرانی هەرێمی كوردستان بەبۆنەی کۆتاییهاتنی ئەرکی هاوپەیمانان و کشانەوەی هێزەکانیان لە عێراق و هەرێمی کوردستان، ڕاگەیەندراوێكی بڵاوكردەوە كە ئەمە دەقەكەیەتی:
لە ڕۆژی کۆتاییهاتنی ئەرکی هاوپەیمانان و کشانەوەی هێزەکانیان لە عێراق و هەرێمی کوردستان، بە سوپاس و پێزانینەوە لە هەموو هاوکارییەکانیان دەڕوانین بۆ هێزەکانی پێشمەرگە و سوپای عێراق لە شەڕی بەرەنگاربوونەوەی تـ.ـیرۆر و پاراستنی ئاسایش و سەقامگیریی عێراق و کوردستان. هەروەها لەم ڕۆژەدا یادی هەموو شـ.ـەهیدانی پێشمەرگە و سوپای عێراق و هاوپەیمانان دەکەینەوە و سڵاو بۆ گیانی پاکیان دەنێرین.
ئێمە لە هەرێمی کوردستان، هاوکارییەکانی هاوپەیمانان لە سێ قۆناغی گرنگ و چارەنووسسازی وەک ڕاگەیاندنی ناوچەی دژەفڕین لە ساڵی 1991، بەتایبەت لەلایەن ئەمریکا و بەریتانیا و فەڕەنسا، ڕووخاندنی ڕژێمی دیکتاتۆری بەعس لە ساڵی 2003 و شەڕی تـ.ـیرۆریستانی د.ا.عـ.ـش لە دوای ساڵی 2014، هەرگیز لەبیرناکەین.
لەئێستاشدا، کشانەوەی هاوپەیمانان و گەڕانەوەی سەروەریی تەواو بۆ عێراق، ساتەوەختێکی مێژوویی گرنگە بۆ عێراق و هەرێمی کوردستان و هەردوو حکومەتی فیدراڵ و هەرێم و هەموو هێزە سیاسییەکانی عێراق و کوردستان و هەموومان لەبەردەم بەرپرسیارێتیی گەورەداین. پێویستە بۆ هاووڵاتییانی عێراق و بۆ کۆمەڵگەی نێودەوڵەتیشی بسەلمێنین کە دەتوانین پارێزگاری لە سەروەریی و ئاسایش و سەقامگیریی وڵاتەکەمان بکەین، ئەم ئەرکەش بەبێ هاوکاری و پێکەوەکارکردن لەپێناو بەرژەوەندیی گشتی و بەبێ جێبەجێکردنی تەواوەتیی دەستوور، بەدی نایەت.
وەک هێزە سیاسییەکانی کوردستانیش، لەبەردەم بەرپرسیارێتییەکی مێژووییداین؛ ئەرکە لەسەرمان بە یەکڕیزی و هاوبیری کاربکەین بۆ بەهێزکردنی دامەزراوە شەرعییەکان و هەنگاونان بەرەو حکومڕانییەکی باشتر و خزمەتگوزار و دادپەروەر، چونکە دواجار دەستکەوتە مێژووییەکانی گەلەکەمان تەنیا بە پشتیوانی و بە متمانەی هاووڵاتییانمان دەپارێزرێت.
لە کۆتاییدا هاووڵاتییانی خۆمان دڵنیادەکەینەوە، هاوکاری و هەماهەنگییەکی زۆرباش هەیە لەنێوان هەردوو حکومەتی فیدراڵ و هەرێم، هێزی پێشمەرگەی کوردستانیش لەوپەڕی ئامادەیی خۆیدایە و وەک هەمیشە ئامادەیە بۆ پاراستنی خاکی کوردستان و سەروماڵی هاووڵاتییان لە هەرچەشنە هەڕەشە و مەترسییەک گیانفیدایی بکات.
