جارێكی خۆپیشاندان لە عێراق دەستیپێكردەوە و هێزە ئەمنییەكان بە گولە ڕوبەڕووی خۆپیشاندەران بوونەوە.
ئەمڕۆ هەینی 5ی شوبات، خۆپیشاندەرانی پارێزگای ناسڕییە لە باشووری عێراق ڕوویانكردەوە گۆڕەپانی حبوبی كە شوێنی خۆپیشاندانەكانی ئەو پارێزگایە و دەكەوێتە ناوەندی شاری ناسڕییە.
خۆپیشاندەرانی ناسڕییە داوا لە حكومەت دەكەن چارەنووسی سەجاد عێراقی ئاشكرابكات كە یەكێكە لە خۆپیشاندەر و چالاكوانانی شارەكە و ماوەیەكە ڕفێندراوە و بێسەروشوێنە.
بە گوێرەی زانیارییەكانی تۆڕی میدیایی ئێستا، خۆپیشاندانەكەی ئەمڕۆی شاری ناسڕییەی ناوەندی پایتەختی زیقار، توندوتیژی تێكەوتووە و پێكدادان لەنێوان هێزە ئەمنییەكان و خۆپیشاندەراندا ڕویداوە و هێزە ئەمنییەكان تەقەیان كردووە.
هەینی ڕابردووش خۆپیشاندەرانی ناسڕییە گردبوونەوە و هەڕەشەی ئەوەیان كرد گەر چارەنووسی ئەو چالاكوانە ئاشكرانەكرێت، خۆپیشاندانەكە بەرفراوانتر دەكەن و دۆخەكە ئاڵۆزتردەبێت.
