ڕەنگی بۆیاخی دەرەوەی خانوو دەتوانێت پلەی گەرمای ناو بیناکە بگۆڕێت و کاریگەریی لەسەر تێچووی کارەباش هەبێت.
ئوسامە ئەنوەر، شارەزا و وەستای بۆیاخی ماڵان، لە لێدوانێکی تایبەتدا بۆ تۆڕی میدیایی ئێستا، ڕایگەیاند، ڕەنگی ڕووکاری دەرەوەی خانوو کاریگەریی زۆری لەسەر گەرمای ناوەوەی خانوو هەیە.
وتیشی، ڕەنگی سپی و کرێمی تیشکی خۆر زیاتر دەگەڕێننەوە و گەرمای کەمتر هەڵدەمژن، بۆیە ناو خانوو ساردتر دەمێنێتەوە.
ئاماژەی بەوەشکرد، بە پێچەوانەوە، ڕەنگە تاریکەکان گەرمای خۆر زیاتر هەڵدەگرن و دەبنە هۆی بەرزبونەوەی پلەی گەرمای ناو خانووەکە، بە تایبەتی لە وەرزی هاویندا.
ئاماژەی بەوەشدا، بە هۆکاری بەهێزیی تیشکی خۆر لە هاویندا هاوڵاتیان هۆشیاریی ئەوەیان هەیە کە ڕەنگە کراوە و فێنکەکان بۆ ڕووکاری دەرەوە و بگرە ناوەوەی خانووەکانیش لە ئێستادا بەکاربهێنن.
ئەو شارەزایەی بۆیاخ، پێشنیار دەکات لە ناوچە گەرمەکانی وەک هەولێر، شارەزوور و گەرمیان هاوڵاتییان زیاتر ڕەنگی سپیی کراوە هەڵبژێرن بۆ ڕووکاری خانووەکانیان، چونکە دەتوانن گەرمای ناو خانوو و تێچووی ساردکەرەوەکان کەمبکەنەوە.
