پۆلیسی هەولێر، ڕایگەیاند، دوو تۆمەتبارمان دەستگیرکرد کە جامی ئۆتۆمبێلیان دەشکاند و دزییان دەکرد.
بەڕێوەبەرایەتیی پۆلیسی پارێزگای هەولێر، ڕایگەیاند، پاش بڵاوبوونەوەی چەند گرتە ڤیدیۆیەک لە تۆڕە کۆمەڵایەتییەکان کە تێیدا تۆمەتباران لە پارکی شـ.ـەهيد سامی عەبدولڕەحمان و لە پێش یاریگای شـ.ـەهید فەڕەنسۆهەریری، جامی ئۆتۆمبێلی هاوڵاتییانیان دەشکاند بۆ مەبەستی دزیکردن و دەنگدانەوەی زۆری لێکەوتەوە، هێزەکانمان لە بەڕێوەبەرایەتیی پۆلیسی پارێزگای هەولێر / بەشی نەهێشتنی تاوان (نووسینگەی نەهێشتنی تاوانی باکوور)، دەستبەجێ لێکۆڵینەوەی وردیان دەستپێکرد.
دەشڵێت، لە ئەنجامی بەدواداچوونەکان و لە ماوەیەکی پێوانەیی کورتدا، هێزەکانمان توانیان شوێنی تۆمەتباران دەستنیشان بکەن و هەردوو تۆمەتباری سەرەکی دەستگیربکەن.
ئاماژە بەوەشدەکات، ئێستا پەڕاوی لێکۆڵینەوەی یاسایی بۆ تۆمەتباران ڕێکخراوە و ڕادەستی دادگا کراون بۆ ئەوەی سزای یاسایی خۆیان وەربگرن.
