سالار عەبدوڵا، بەڕێوەبەری پاسپۆرتی سلێمانی لە لێدوانێکی ڕۆژنامەوانییدا ڕایگەیاند، ئەو هاوڵاتییانەی لە دەرەوەی وڵات مافی نیشتەجێبوون و پەنابەرێتییان پێدراوە لەسەر بنەمای ئەوەی کە لە وڵاتی خۆیان کێشەیەکیان هەیە، لەکاتی گەڕانەوەیان بۆ کوردستان لە فڕۆکەخانەکان مۆر لە پاسپۆرتەکانیان دەدرێت کە دواتر لەکاتی گەڕانەوەیان لە گەشتەکەیان تووشی کێشەی یاسایی دەبن.
ڕوونیکردەوە، بە بوونی ئەو مۆرە هاوڵاتییەکە تووشی گرفتی یاسایی دەبێت کە زۆر جار وادەکات وڵاتی دووەم مافی پەنابەرێتی و نیشتەجێبوونی ئەو هاوڵاتییە کوردە بەهۆی ئەو مۆرەوە هەڵبوەشێنێتەوە و دیپۆرتی بکاتەوە، چونکە کە دەبینن مۆری عێراق و هەرێمی کوردستانی لەسەرە، دەڵێن دیارە کێشەکەت لە وڵاتی خۆت چارەسەرکردووە.
سالار عەبدوڵا ئاماژەی بەوەشدا، ئەم کێشەیە لە فڕۆکەخانەکانی عێراق چارەسەربووە، لە فڕۆکەخانەکانی بەغداد، کەرکوک، نەجەف و بەسڕە سیستمی دەرگای ئەلیکترۆنی پەیڕەو دەکرێت کە مۆری داخڵبوون و چوونەدەرەوە لە پاسپۆرتی گەشتیاران نادرێت.
بە وتەی بەڕێوەبەری پاسپۆرتی سلێمانی، ماوەی دوو ساڵە سیستمی دەرگای ئەلیکترۆنی لە فڕۆکەخانەکانی هەرێمی کوردستان هەیە بەڵام لەلایەن حکومەتی هەرێمی کوردستانەوە کاری پێناکرێت.
