ئەمڕۆ کۆبوونەوەکانی وەرزی دووەمی یاسادانانی ئەنجومەنی نوێنەرانی عێراق دەستپێدەکاتەوە و تێیدا خوێندنەوەی یەکەم بۆ چوار پێشنیاری یاسا دەکات.
نووسینگەی ڕاگەیاندنی ئەنجومەنی نوێنەرانی عێراق لە بەیاننامەیەکدا کارنامەی دانیشتنی ئەمڕۆ (دووشەممە، 6ـی تەمموزی 2026) بڵاوکردەوە و ڕایگەیاند، “کارنامەکە خوێندنەوەی یەکەمی یاسای پێشنیارکراوی تاوانی ئەلیکترۆنی (سایبەر) و خوێندنەوەی یەکەم بۆ هەموارکردنەوەی پێشنیارکراوی یاسای چاودێریکردنی نەوجەوانان ژمارە (78)ی ساڵی 1980 لەخۆدەگرێت.”
ئەوەشی خستۆتەڕوو، هەروەها کارنامەکە خوێندنەوەی یەکەم بۆ هەموارکردنەوەی پێشنیارکراوی یاسای پارێزەران ژمارە (173)ی ساڵی 1965 و خوێندنەوەی یەکەم بۆ یاسای پێشنیارکراوی دارایی بۆ بەهێزکردنی سیستمی بەرگریی ئاسمانیی عێراق لەخۆدەگرێت.
