چاکسازیی گەورانی سلێمانی ڕایدەگەیەنێت، کەناڵی ڕووداو بەبێ گوێدانە ئیتیکی ڕۆژنامەوانی هەواڵی چەواشەکارانە لەسەر چاکسازیی گەورانی سلێمانی بڵاودەکاتەوە و سبەینێ سکاڵای یاساییان لەسەر تۆماردەکەین.
چاکسازیی گەورانی سلێمانی ڕوونکردنەوەیەکی بۆ ڕای گشتیی بڵاوکردووەتەوە و تیایدا هاتووە، سەبارەت بە هەواڵ و بڵاوکراوەیەکی نادروست و نابەرپرسانەی كەناڵی ڕووداو، كە گوایە لە چاكسازیی گەورانی سلێمانی چاودێرەكان بە چـ.ـەقۆ و بۆكس خـ.ـەنجەر هەڕەشە لە سزادراوان دەكرێت، وەک بەڕێوەبەرایەتیی چاكسازیی گەورانی سلێمانی، سەرلەبەری ئەم هەواڵە چەواشەكارییە ڕەتدەكەینەوە.
ئەوەشی خستووەتەڕوو، ئەم شێوازە لە كۆكردنەوەی هەواڵ و بڵاوكردنەوەی، بە هیچ شێوەیەک خزمەت بە گەیاندنی ڕاستییەكان ناكات، كەناڵی ڕووداو بەبێ گوێدانە ئیتک و مۆڕاڵی ڕۆژنامەوانی، تەنیا بە مەبەستی ناشرینكردنی چاکسازیی گەورانی سلێمانی، هەواڵی چەواشەكار و بێ بنەما بڵاودەكاتەوە.
لە کۆتایشدا هاتووە، سبەینێ یەکشەممە، 5ی تەمموزی 2026، سكاڵای یاسایی لەسەر كەناڵی ڕووداو تۆماردەكەین.
