وتەبێژی پۆلیسی دارستان و ژینگەی سلێمانی ڕایدەگەیەنێت، ئێستا کە ڕاوچییەکان دەگەڕێنەوە بۆ دەریاچەکان، هێزەکانمان چاودێرییەکانیان چڕکردووەتەوە، ئامانجیشمان لەمە ڕێگریکردنە لەو هەر شێوازێکی ناتەندروست و نایاسایی ڕاوکردن.
هێمن کەمەرخان، وتەبێژی پۆلیسی دارستان و ژینگەی سلێمانی لە لێدوانێکدا بە تۆڕی میدیایی ئێستای ڕاگەیاند، ئێستا کە ڕاوچییەکان دەگەڕێنەوە بۆ دەریاچەکان، هێزەکانمان چاودێرییەکانیان چڕکردووەتەوە، ئامانجیشمان لەمە ڕێگریکردنە لەو هەر شێوازێکی ناتەندروست و نایاسایی ڕاوکردن، کە ببێتە هۆی تێکدانی ژینگە ئاوی و ماسییەکان، بۆیە تەنیا ئەو ڕاوکردنە ڕێگەپێدراوە کە هێمنایەیە و دوورە لە دروستکردنی پشێوی.
وتیشی، بەگوێرەی ڕێنماییەکان، بەکارهێنانی قولاب و تۆڕی کونی گەورە بە شێوەیەکی بێدەنگ ئاساییە، بەڵام ئەو شێوازەی کە تیایدا ڕاوچی تۆڕێکی گەورە دادەنێت و بە دەنگی بەرز و سووڕانەوەی خێرای بەلەم ماسییەکان دەترسێنێت، بەتەواوی قەدەغەیە، هەروەها، بەکارهێنانی تەقەمەنی، کارەبا، دەرمانی قڕکەر و تۆڕی ورد وەک کۆمەڵکوژییەکی ژینگەیی هەژما دەکرێن.
