ئاژانسی هەواڵی “ڕۆیتەرز” لە زاری بەرپرسێکی باڵای پاکستانییەوە بڵاویکردەوە، هەوڵە نێودەوڵەتی و هەرێمییەکان بۆ هێورکردنەوەی دۆخی ناوچەکە گەیشتوونەتە قۆناغێکی پێشکەوتوو، و داڕشتنی ڕێککەوتنی کۆتاییهێنان بە شەڕ لە وێستگەی کۆتاییدایە.
بەپێی وتەی ئەو بەرپرسە پاکستانییە کە بۆ ئاژانسەکە قسەی کردووە، دانوستانەکان لە چەند ڕۆژی ڕابردوودا پێشکەوتنی بەرچاویان بەخۆیانەوە بینیوە و ڕێککەوتنی داهاتوو تا ڕادەیەکی زۆر “گشتگیر” دەبێت، بە شێوازێک کە بنەماکانی ئاشتیی بەردەوام جێگیر دەکات و زۆربەی خاڵە جێناکۆکەکانی نێوان لایەنە شەڕکەرەکان لەخۆ دەگرێت.
ئەم پێشهاتە سیاسییە لە کاتێکدایە کە ناوچەکە لەژێر کاریگەریی گرژییەکی تونددایە، و چاودێرانی سیاسیش پێیان وایە تێوەگلانی وڵاتانی وەک پاکستان لە نێوەندگیرییەکاندا، چانسی سەرکەوتنی ڕێککەوتنەکە و ڕاگرتنی هەمیشەیی شەڕ زیاتر دەکات.
