وتەبێژی دامەزراوەی هێڵی ئاسمانی مەدەنی ئێران ئاشکرایکرد، ئەم هەفتەیە گەشتی ئاسمانی نێوان ئێران و عێراق دەستپێدەکاتەوە و گەشتەکان لە تاران بۆ بەغداد و لە مەشهەد بۆ نەجەف دەبێت.
محەمەد حسێن، وتەبێژی دامەزراوەی هێڵی ئاسمانی مەدەنی ئێران دوێنێ 14 ی شوبات، لە لێدوانێکی ڕۆژنامەوانیدا ڕایگەیاند، “گەشتی هێڵە ئاسمانییە عێراقییەکان بە ڕەچاوکردنی پرۆتۆکۆڵە پزیشکییەکان لە نێوان هەردوو وڵاتدا دەستپێدەکاتەوە و ئێستا هیچ هۆکارێک بۆ سانسۆرکردنی گەشتەکان نییە”.
ئەو بەرپرسە ئێرانییە ئاشکراشیکردووە، “هێڵە عێراقییەکان ئێستا دەتوانن لە نێوان تاران و بەغداد و نەجەف و مەشهەد بە پێچەوانەوە گەشت بکەن، بەڵام دەبێت ڕێنماییە تەندروستییەکان وەک ئەوەی دانراوە جێبەجێ بکرێت”.
لە کاتی بڵاوبوونەوەی ڤایرۆسی کۆرۆنا لە ئێران و پاشان گواستنەوەی بۆ عێراق لەماوەی ساڵێکدا چەندینجار گەشتە ئاسمانی و وشکانییەکانی نێوان ئەو دوو وڵاتە ڕاگیراون و ئێستاش بەهۆی هێواشبوونەوەی ئامارەکانی مردن و توشبوون بە ڤایرۆسەکە گەشتە ئاسمانییەکان دەستپێدەکاتەوە.
