وتەبێژی یەکێتیی نیشتمانیی کوردستان ڕایدەگەیەنێت، بەشدارییە کاریگەرەکانی یەکێتی لە سەرجەم بوارەکاندا دەرئەنجامی سیاسەتی حەکیمانەی سەرۆک بافڵە.
کاروان گەزنەیی، وتەبێژی یەکێتیی نیشتمانیی کوردستان ڕایگەیاند، یەکێتی وەک حزبێکی سیاسی، لە هەرێمی کوردستان و عێراقدا، داینەمۆ و سەرمەشق بووە، هەمیشە پێشەنگ بووە لە گۆڕانکاری، یەکێتی هیچ کاتێک لە گۆڕانکاری نەترساوە و لەگەڵ سەرجەم هەلومەرجەکان خۆی گونجاندووە.
باسی لەوەشکرد، وەک هەنگاوێکی گرنگ و ڕێکخراوەیی، یەکێتی بڕیاری گۆڕانکاری داوە، گۆڕانکارییەکان نە بە مانای سزادانی کۆمەڵێک هەڤاڵ دێت نە بە مانای پاداشتکردنی کۆمەڵێک هەڤاڵ دێت، بەڵکو ئەمە ئاوێتەکردنی کۆمەڵێک ئەزموون و هێنانەپێشەوە و دەرفەتدانە بە کۆمەڵێک هەڤاڵ، تا بتوانن خزمەت بکەن.
وتیشی، ئەمڕۆ یەکێتی بەشدارە لە سەرجەم بوارەکاندا، بەشدارە لە بڕیارە ستراتیجییەکانی عێراق، بێگومان ئەمەش دەرئەنجامی سیاسەتی حەکیمانەی سەرۆک بافڵ و مەکتەبی سیاسی و ئەنجومەنی سەرکردایەتیی یەکێتییە.
