بەڕێوەبەرایەتیی کارەبای سلێمانی رایدەگەیەنێت، بەهۆی رەشەباوە چەند گەڕەکێکی شارەکە بێکارەبا بوون و تیمەكان سەرقاڵی چارەسەركردنن.
لە راگەیەندراوێکی بەڕێوەبەرایەتیی کارەبای سلێمانیدا هاتووە، “بەهۆی ئەو رەشەبایە كە لە دوێنێ شەوەوە سنووری پارێزگای سلێمانی گرتووەتەوە، زیان بە تۆڕەكانی كەوتووە و چەند گەڕەك و ناوچەیەك كارەباكەیان کوژاوەتەوە”.
ئاماژەی بەوەشدا، بەپێی داتاكانی بەڕێوەبەرایەتیی كۆنترۆڵ و گەیاندنی كارەبای سلێمانی، بەهۆی ئەو رەشەباکەوە، لە ناوشار 19 فیدەری كارەبا و لە دەرەوەی شاریش شەش فیدەر، كێشەیان تێکەوتووە.
کارەبای سلێمانی دەشڵێت، “لەئێستادا تیمی هۆبەكانی چاكسازیی كارەبا، سەرقاڵی چارەسەری كێشەكانن، تا بەزووترین کات، كارەبا بۆ هاوڵاتییان بگێڕنەوە”.
