بڕیارە ڕۆژی پێنجشەممە، لە دادگای ڕەسافەی بەغداد دووەم دانیشتنی دادگاییکردنی عەجاج ئەحمەد حەردان تکریتی، بە ئامادەبوونی دەیان شایەتحاڵ و کەسوکاری ئەنفالکراوان بەڕێوەبچێت.
دوای كۆكردنەوەی سەدان بەڵگە و وەرگرتنی سكاڵا لە شایەتحاڵانی ئەنفال، ڕۆژی پێنجشەممەی ڕابردوو، بە ئامادەبوونی دەیان شایەتحاڵ و کەسوکاری ئەنفالکراوان، یەكەم دانیشتنی دادگاییكردنی عەجاج ئەحمەد حەردان، ناسراو بە جەلادەكەی نوگرەسەلمان لە دادگای باڵای تاوانەكان لە بەغداد ئەنجامدرا.
سەبەینێ پێنجشەممە، بە مەبەستی تەواوکردنی ڕێکارە یاساییەکان و بیستنی وتەی شایەتحاڵەکانی دیکە، بڕیارە دووەم دانیشتنى دادگاییەکە بەڕێوەبچێت.
لە دانیشتنەکەی پێنجشەممەى ڕابردوودا، زیاتر لە 250 سكاڵا لەلایەن كەسوكاری ئەنفالەوە لەسەر عەجاج تۆماركرابوون و 17 شایەتحاڵ و ژمارەیەک لە كەسوكاری ئەنفال لە دانیشتنەكەدا ئامادەبوون وتەیان لێ وەردەگیرا.
