وەزارەتی ناوخۆی هەرێمی کوردستان لە ڕاگەیەندراوێکدا بڵاویکردەوە، بە مەبەستى هاوکاریکردنى ئەو بیانیانەى بە ڕەسمی و لە ڕێى ڤیزەوە هاتوونەتە هەرێمى کوردستان و بە هەر هۆکارێک نەیانتوانیوە ڤیزەکانیان درێژ بکەنەوە، یان نەیانکردۆتە نشینگە، نشینگەیان هەبووە و بەسەر چووە، بەپێى ئەو دەسەڵاتەى پێمان دراوە لە یاساى وەزارەتى ناوخۆ ژمارە (6ـى ساڵى 2009).
بڕیارماندا بە:
یەکەم: ئەوانەى دەیانەوێ لە کوردستان بمێننەوە و نشینگەى نوێ دەربکەن یان کارتى نشینگەیان نوێ بکەنەوە، پێویستە لەماوەى 90 ڕۆژى کارکردن سەردانى یەکێک لە بەڕێوەبەرایەتییەکانى نشینگە بکەن و تەنیا (25%)ى کۆى گشتى سزاکانى دواکەوتن کە لەڕێنمایی ژمارە (1ـى ساڵى 2021) هاتووە، لێیان وەردەگیرێت.
دووەم: ئەوانەى دەیانەوێ هەرێمى کوردستان بەجێبهێڵن و بگەڕێنەوە وڵاتى خۆیان بەهەمان شێوەى خاڵى یەکەم مامەڵەیان لەگەڵ دەکرێت و مۆرى دەرچوون لە بەڕێوەبەرایەتییەکانى نشینگە وەردەگرن.
وەزارەتی ناوخۆ هاوکات ڕوونیشیکردووەتەوە، ئەم فەرمانە لەڕۆژى دەرچوونیەوە جێبەجێ دەکرێت و بۆماوەى 90 ڕۆژ بەرکاردەبێت لەدواى ماوەى دیاریکراو هەرجۆرە سەرپێچییەکى مانەوە بەپێى ڕێنمایی ژمارە (1ـى ساڵى 2021) مامەڵەى لەگەڵ دەکرێت .
