ئەمڕۆ تیمێکی دەستەی سەربەخۆی مافەکانی مرۆڤ سەردانی شێروان شێروانی کرد و ناوبراو دوو داواکاریی سەرەکیی هەبووە.
دەستەی سەربەخۆی مافەکانی مرۆڤ لە ڕاگەیەندراوێکدا ئاشکرایکرد، لە چوارچێوەی ئەرکە چاودێرییەکانی دەستەی سەربەخۆی مافەکانی مرۆڤ، سەردانی بەڕێوەبەرایەتیی چاکسازیی گەورانی هەولێرمان کرد، ئامانجی سەردانەکەش بەمەبەستی لە نزیکەوە ئاگاداربوون بوو لە بارودۆخی سزادراوان و گوێگرتن لە داواکارییەکانیان.
ئاماژەی بەوەشکرد، لەو چوارچێوەیەدا، دەستەکەمان چاویان بە (شێروان شێروانی) کەوت و گوێیان لە داخوازییەکانی گرت، شێروان شێروانی دوو داواکاری سەرەکیی ئاڕاستەی دەستە کرد، ئەویش پێدانی مۆڵەتی چوونەوە ماڵەوە بوو، بەگوێرەی یاسا و ڕێنمایییەکان، لە حاڵەتی جێبەجێ نەکردنی داواکاریی یەکەم، ڕێگەی پێبدرێت بگوازرێتەوە بۆ چاکسازیی گەورانی سلێمانی، ناوبراو ڕایگەیاند، وەڵامی دروستی ئەم داواکارییە، دەبێتە هۆی ئەوەی کۆتایی بە مانگرتنەکەی بهێنێت.
