بەرپرسێكی بەڕێوەبەرایەتیی گشتیی هاتوچۆی هەرێم ڕوونكردنەوە لەبارەی گۆڕینی مۆڵەتی شۆفێری و ساڵنامەی ئۆتۆمبێل دەدات و دەڵێت، “دوای گۆڕینی تابلۆی ئۆتۆمبێل، مۆڵەتی شۆفێری و ساڵنامەش لەگەڵ بەغداد یەكدەخرێن و دەگۆڕدرێن”.
عەقید ئەسعەد مەلاكەریم، وتەبێژی بەڕێوەبەرایەتیی گشتیی هاتوچۆی هەرێمی كوردستان لە لێدوانێكدا بە تۆڕی میدیایی ئێستای ڕاگەیاند، گۆڕینی مۆڵەتی شۆفێری و ساڵنامەی ئۆتۆمبێل خراوەتە بەرنامەوە و لەگەڵ بەرپرسانی حكومەتی عێراق ئەو پرسەمان تاوتوێكردووە.
ئاماژەی بەوە كرد، “لەگەڵ حكومەتی عێراق لەسەر گۆڕینی تابلۆی ئۆتۆمبێل ڕێككەوتووین و ئێستا بەشی هەماهەنگیمان لەگەڵ بەغداد هەیە و بەردەوام لەپەیوەندیداین”.
وتەبێژی هاتوچۆی هەرێم باسی لەوە كرد، “ئێستا ئەولەویەتمان داوە بە گۆڕینی تابلۆی ئۆتۆمبێل و دوای یەكخستنی تابلۆكان دەستدەكرێت بە گۆڕینی مۆڵەتی شۆفێری و ساڵنامەی ئۆتۆمبێل”.
بەوتەی عەقید ئەسعەد، “گۆڕانكاری لە شێوازی ساڵنامەی ئۆتۆمبێل و مۆڵەتی شۆفێری دەكرێت، بەڵام لەگەڵ بەغداد هەماهەنگیی تەواو لەسەر ئەو دوو بابەتە دەكەین و جێبەجێدەكرێن”.
