چه‌ند ڕۆژێك له‌مه‌وبه‌ر هێزە ئەمنییەکانی ئێران لە شاری جوانڕۆی ڕۆژهەڵاتی کوردستان، سێ کچی نەوجەوانیان دەستگیرکرد و دوای ئازادکردنیان یەکێک لە دەستگیرکراوەکان هەوڵی خۆکوژی دا و دۆخی تەندروستیی ناجێگیرە.
بەپێی هەواڵی ڕێکخراوەکانی مافی مرۆڤ، ئەو کچە نەوجەوانانەی دەستگیرکراون ناویان “تارا ئەحمەدی 16 ساڵ و سۆنیا کەریمی 14 ساڵ و پەریا فەتحی 14 ساڵن” و بەهۆکاری نادیار دەستگیرکراون. دوای دەستگیرکردنی ئەو سێ کچە نەوجەوانە و دوای ڕۆژێک زیندانیكردنیان و ئاگادارکردنەوەی کەسوکاریان ئازادکراون.
به‌گوێره‌ی زانیارییه‌كان، دوای ئازادکردنی ئەو کچە گەنجانە لەلایەن هێزە ئەمنییەکانەوە “تارا ئەحمەدی” هەوڵی خۆکوژی داوە و دواتر لە بەشی چاودێریی چڕ خەوێندراوە و باری تەندروستیی ناجێگیرە.
دەستگیرکردنی کەسانی منداڵ و زیندانیکردنیان دژی یاساکانی مافی پاراستنی منداڵە، بەڵام لە ئێران جگە لە دەستگیرکردن دۆسیەی لەسێدارەدانی کەسانی خوار تەمەن 18 ساڵ هەیە.
