کەشناسیی هەرێمی کوردستان ڕایدەگەیەنێت، ئەمڕۆ و سبەی، لە چەندین ناوچەی جیاوازی هەرێمی کوردستان بارانی بەهاری دەبارێت.
بەڕێوەبەرایەتیی گشتیی کەشناسی و بومەلەرزەزانیی هەرێمی کوردستان ڕایگەیاند، کاریگەریی ئەو شەپۆلە بارانبارینەی ڕووی لە ناوچەکەمان کردبوو، کۆتاییهاتووە و لەئێستادا، ئاسمانی هەرێمی کوردستان بەگشتی نیمچەهەورە.
ئاماژەی بەوەشکرد، دوای نیوەڕۆی ئەمڕۆ باران بەشێوەی تاوەبارانی کورتخایەنی بەهاری دەبارێت لە ناوچە شاخاوییەکان و بەشێک لە سەنتەری قەزا و ناحیەکانی ناوچە شاخاوییەکان؛ لە سنووری ئیدارەی ڕاپەڕین ئەگەری بارانبارینی بەهاری زیاتر دەبێت بەراورد بە ناوچەکانی دیکە. ئەگەری نمەباران لە سەنتەری پارێزگای دهۆک و سلێمانی دەبێت لە کاتەکانی دوای نیوەڕۆ، لەگەڵ بوونی هەورەبروسکە لە کاتی باران، پلەی گەرمییش کەمێک نزمدەبێتەوە.
ڕاشیگەیاند، سبەى چوارشەممە، بەگشتی ئاسمان ساماڵ و پەڵەهەور دەبێت، پاشان بۆ نیمچەهەور دەگۆڕێت؛ ئەگەری بارانبارین لەسەر ناوچە شاخاوییەکان هەیە بەشێوەی گەواڵە بارانی بەهاری، هەروەها ئەگەری گۆڕانکاری هەیە لە شێوازی دابارین، بەجۆرێک ناوچەیەک بارانی لێ ببارێت و ناوچەیەکی دیکە بێ باران بێت. پلەی گەرمییش کەمێک بەرزدەبێتەوە.
بەرزترین پلەی گەرمیی پێشبینیکراو بە پلەی سیلیزی:
هەولێر: 22 پلەی سیلیزی
پیرمام: 20 پلەی سیلیزی
سۆران: 20 پلەی سیلیزی
حاجی ئۆمەران: 13 پلەی سیلیزی
سلێمانی: 19 پلەی سیلیزی
چەمچەماڵ: 22 پلەی سیلیزی
دهۆک: 20 پلەی سیلیزی
زاخۆ: 21 پلەی سیلیزی
هەڵەبجە: 22 پلەی سیلیزی
گەرمیان: 23 پلەی سیلیزی
