وەزارەتی تەندروستیی هەرێمی کوردستان ئەمڕۆ چوارشەممە 3ی شوبات، ئاماری 24 کاتژمێری ڕابردووی توشبوون و گیانلەدەستدانی بە کۆرۆنا لە هەرێم بڵاوکردەوە و بەوپێیەش 48 تووشبوون و سێ گیانلەدەستدان تۆمارکراون.
لە ڕاگەیەنراوێکدا وەزارەتی تەندروستیی هەرێمی کوردستان ڕایگەیاند، ” لە شەو و ڕۆژی رابردوودا 48 توشبوون تۆمارکراون لەو ژمارەیەش، هەشت کەس لە هەولێر، 11 لە سلێمانی، 28 توشبوو لە دهۆک و یەک توشبوو لە گەرمیان تۆمارکراوە”.
بەپێی ڕاگەیەنراوەکە، سێ حاڵەتی گیانلەدەستدان لە هەرێم تۆمارکراوە و هەر سێ حاڵەتەکەش لە دهۆک بووە.
بەپێی ئامارە گشتییەکانی وەزارەتی تەندروستیی هەرێمی کوردستان تاوەکو ئێستا 106 هەزار و 287 کەس توشبوون لە هەرێمی کوردستان تۆمارکراوە، لەو ژمارەیەش 100 هەزار و 46 کەس چاکبوونەتەوە، سێ هەزار و 477 کەسیش گیانیانلەدەستداوە.
