وەزارەتی ناوخۆی هەرێمی کوردستان بڵاویکردەوە، بەمەبەستی هاوکاریکردن و کارئاسانی بۆ ئەو بیانیانەی بەهۆی بارودۆخی جەنگەوە نەیانتوانیوە گەشت بکەن یان نشینگەکانیان نوێبکەنەوە، بڕیاریدا بە لێخۆشبوون لە سزای دارایی بەم شێوەیە:
– بۆ ئەوانەی نشینگەیان بەسەرچووە و لە دەرەوەی هەرێمی کوردستانن: ئەوانەی پاش 28ی شوباتی 2026 نشینگەکەیان بەسەرچووە، دەتوانن تا 30ی نیسانی 2026 بە هەمان کارت بگەڕێنەوە هەرێمی کوردستان و بەبێ سزا نشینگەکەیان نوێبکەنەوە، پاش ئەم ڕێکەوتە پێویستیان بە ڤیزای نوێ دەبێت.
– بۆ ئەوانەی دەیانەوێت گەشتی دەرەوە بکەن: ئەو بیانیانەی نشینگە یان پاسپۆرتەکەیان بەسەرچووە و نەیانتوانیوە گەشت بکەن، تا 30ی نیسانی 2026 دەتوانن بەبێ پێدانی سزای دارایی, مۆری دەرچوون وەربگرن و گەشت بکەن.
– بۆ گەشتیارانی خاوەن ڤیزا: ئەو گەشتیارانەی لە دوای 28ی شوباتی 2026 ڤیزاکەیان بەسەرچووە، دەتوانن تا 30ی نیسانی 2026 بەبێ سزا لە فڕۆکەخانە و دەروازەکانەوە بچنە دەرەوە, ئەوانەشی دەیانەوێت ڤیزاکەیان بگۆڕن بۆ نشینگە، بەبێ سزا و بەپێی ڕێنماییەکان مامەڵەیان بۆ دەکرێت.
ئەوەشی خستەڕوو، ئەم بڕیارانە تەنیا تا کۆتایی مانگی نیسانی 2026 کاری پێدەکرێت.
