شارەزایەکی بواری کەشناسی ڕایدەگەیەنێت، ڕۆژی یەکشەممە بەهۆی بارانی بەخوڕەوە ئەگەری دروستبوونی لافاو هەیە و تەرزەی قەبارە گەورەش لە هەندێک شوێن دەبارێت.
ئاراس جەبار، شارەزای بواری کەشناسی ڕایگەیاند، سبەی شەممە، 11ـی 4ـی 2026، لە ئەنجامی هاتنی هەوایەکی شێدار لە دەریای سوور و کاریگەریی نزمەپاڵەپەستۆی دەریای ناوەڕاست، ئاسمانی هەرێمی کوردستان لە کاتەکانی نیوەڕۆوە بەزۆری دەگۆڕێت بۆ نیمچەهەور و لە شوێن و ناوچەی جیاجیادا، هەورەبروسکە و تاوەبارانی کورتخایان دەستپێدەکاتەوە و لە ناوچە شاخاوییەکان تاوەبارانەکان بەخوڕ دەبن.
ئاماژەی بەوەشکرد، پلەی گەرمی بەراورد بە ئەمڕۆ، 2 پلە دادەبەزێت، بای باشوور و باشووری ڕۆژهەڵات لە کاتەکانی بەیانی بۆ ئێوارە چالاک دەبێت بە خێرایی 15-35کم/ک، لە کاتەکانی ئێوارە و بەتایبەت شەو، کاریگەریی ئەو ناجێگیرییە لە کەش و بەرگەهەوای ناوچەکەدا زیاتر دەبێت و ئەگەری چالاکبوونی هەورەبروسکەی بەهێز و تاوەتەرزە و بارانی بەخوڕ دەبێت، بەتایبەتیش لە ناوچەکانی سنووری پارێزگای سلێمانی و هەڵەبجە و ئیدارەی سۆران و ڕاپەڕین و ناوچە شاخاوییەکانی باکووری پارێزگای دهۆک کاریگەری زیاتر دەبێت.
دەشڵێت، لە ناوچەکانی سنووری ئیدارەی گەرمیان و پارێزگای کەرکوک و سەنتەری پارێزگای هەولێر و دهۆکیش ئەگەری چالاکبوونی هەورەبروسکە و تاوەبارانی لاواز بۆ مامناوەندی کورتخایان دەبێت.
ئەو شارەزایە ئەوەشی ئاشكراکردووە، بۆ دوو سبەی یەکشەممە، کاریگەریی ئەو حاڵەتە ناجێگیرییە بەهێزتر دەبێت و ئەگەر هەیە لە هەندێک شوێندا لافاو دروستببێت لەگەڵ بارینی تەرزە بە قەبارەی گەورە.
