بەپێی ئامارێکی دەزگای گشتیی کاروباری مین، لە ماوەی ساڵی ڕابردوودا لە هەرێمی کوردستان 19 کەس بە مین گیانیان لەدەستداوە و 23 کەسی دیکەش برینداربوون.
دەزگای گشتیی کاروباری مین ئاماری ساڵی ڕابردووی ڕاگەیاند و دەڵێت، “ساڵی ڕابردوو 42 کەس وەک بەرکەوتووی مین و تەقەمەنی براونەتە نەخۆشخانە یان گیانیان لەدەستداوە”.
ئامارەکە دەریدەخات لە ماوەی یەک ساڵدا یەک هەزار و 894 پارچە مین لابراون و لەو ژمارەیەش یەک هەزار و 814 دانەیان “دژەکەسی” بوون.
بەهۆی شەڕی چەند ساڵەی نێوان عێراق و ئێران و ناکۆکییە ناوخۆییەکان، هەرێمی کوردستان سەدان ناوچەی پیسبووی بە مین و تەقەمەنی هەیە، ئەگەرچی ئەو مینانە خاوەنەکانیان ئێستا لەسەر حوکم و دەسەڵات نەماون، بەڵام ئەوان تا ئێستاش شەڕی خۆیان لەگەڵ خەڵکی و گیاندارانی ناوچەکان دەکەن.
