ئاراس جەبار، شارەزای بواری کەشناسی ڕایگەیاند، بۆ ئەمشەو بارانی مامناوەند و باش بەردەوامدەبێت، بەتایبەت لە سنووری پارێزگای سلێمانی، هەڵەبجە و هەردوو ئیدارەی گەرمیان و ڕاپەرین، لە ناوچەکانی سنووری پارێزگای دهۆک، هەولێر، کەرکوک و ئیدارەی سۆرانیش، هەندێک کات بارانێکی مامناوەند دەبارێت.
وتیشی، سبەی شەممە، کاریگەریی نزمەپاڵەپەستۆکە لەسەر ناوچەکانی سنووری پارێزگای سلێمانی، هەڵەبجە و ئیدارەی ڕاپەرین بەردەوامدەبێت، ناوبەناو بارانی پچڕپچڕ و مامناوەند تا کاتەکانی ئێوارە بەردەوامدەبێت، لە ناوچەکانی دیکەی هەرێمی کوردستان کەشوهەوا تا ڕادەیەک جێگیردەبێتەوە، بە گشتی لە کاتەکانی ئێوارەی سبەی شەممە، کەشوهەوا لە تەواوی ناوچەکانمان بەرەو جێگیربوونەوە دەڕوات و بارانەکە کۆتاییدێت.
ئاماژەی بەوەشکرد، لە نیوەڕۆی یەکشەممەوە، جارێکی دیکە ناوچەکانمان دەکەوێتەوە ژێر کاریگەریی هاتنی نزمەپاڵەپەستۆیەکی نوێی دەریای ناوەڕاست و بارانبارین دەستپێدەکاتەوە.
