بڕیارە لە ئایندەیەکی نزیکدا چوار ژن و منداڵەکانیان کە پێشتر لەناو داعشدا بوون بگەڕێنەوە بۆ وڵاتی سوید، چونکە پێشتر ناسنامەی ئەو وڵاتەیان هەبووە.
ئەندامێکی ئەنجومەنی شارەوانی ستۆکۆڵم ئاشکرایکردووە، ئەو ژن و منداڵانە ماوەی دوو مانگ لە تورکیا بۆ پشکنینی دی ئێن ئەی هێڵراونەتەوە تا دڵنیا بن ئەو ژنانە دایکی منداڵەکانن.
بەپێی زانیارییەکان سێ لەو چوار ژنانەی داعش خەڵكی ستۆکهۆڵمن و یەکێکیشیان ڕۆژئاوای سویدە.
شیار عەلی، نوێنەری بەڕێوبەرایەتی خۆسەری دیموکراتیک لە سوید لەسەر ئەو پرسە ڕایگەیاندووە، “شانە نوستووەکانی داعش تا ئێستاش چالاکن و هەوڵدەدەن ئەندامانی داعش لە کەمپەکان بە پارە دەربهێنن و ڕزگاریان بکەن، ئەم چوار ژنە و منداڵەکانیشیان هەر لەناو هەمان پرۆسەدایە.
ئەنجومەنی شارەوانی ستۆکۆڵم ڕایگەیاندووە، “لەگەڵ گەیشتنی ژنەکان بە سوید منداڵەکانیان لێوەردەگیرێتەوە، چونکە ئەوان نەیانتوانیووە منداڵەکانیان بە بەرپرسیارێتییەوە بەخێوبکەن و تێکەڵیان کردوون لەگەڵ ڕێکخراوێکی تیرۆرستی”.
