بەرپرسی راگەیاندنی شارەوانیی سلێمانی رایدەگەیەنێت، کە ئاییندەیەکی نزیکدا قۆناغی چوارەمی دابەشکردنی زەوی رادەگەیەنرێت.
ئەنجومەن حوسێن، بەرپرسی راگەیاندنی شارەوانیی سلێمانی بە تۆڕی میدیایی ئێستای راگەیاند، “لە سێ قۆناغی پێشوتری دابەشکردنی زەوی، نزیکەی 21 هەزار پارچەزەویمان دابەشکردووە، بۆ قۆناغی چوارەم، لیژنەیەک لە ئەنجومەنی شارەوانیی سلێمانی راسپێردراوە، کە ئەرکیان دەستنیشانکردنی شوێنی شیاو و گونجاوە بۆ فەرمانبەران، لە ئەگەری نەبوون یان کەمیی زەویدا، ئەو لیژنەیە شوێنی نوێ دەدۆزنەوە”.
وتیشی، هێشتا روون نییە کەی قۆناغی نوێی دابەشکردنی پارچەزەوی رادەگەیەنرێت، هەروەها روون نییە ژمارەی پارچەزەوییەکان چەند دەبن، تیروپشکی دابەشکردنی پارچەزەوییەکانیش بەپێی خاڵبەندییدە، هەوڵدەدەین لە ئاییندەیەکی زۆر نزیکدا قۆناغی نوێی دابەشکردنی پارچەزەوی رابگەیەنین.
