سەرچاوەیەک لە وەزارەتی دارایی و ئابوریی هەرێمی کوردستان رایگەیاند، کێشەیەکی تەکنیکی بۆ لیستی مووچەی مانگی شوبات دروستبووە و بەهۆیەوە تا ئێستا ئامادەکردنی لیستەکە تەواونەکراوە بۆ ئەوەی رەوانەی بەغداد بکرێت.
بەگوێرەی ئەو سەرچاوەیە، کێشەکە لە لیستی خانەنشینانی هەرێمی کوردستان دروستبووە و لە ئێستادا تیمەکانی وەزارەت سەرقاڵی چارەسەرکردنین.
هەمان سەرچاوە ئاماژەی بەوەشدا، پێشبینیدەکرێت ئەمڕۆ یان سبەی کێشەکە چارەسەربکرێت و وردبینیی کۆتایی لە لیستەکەدا بکرێت، پاشان راستەوخۆ رەوانەی بەغداد دەکرێت بەمەبەستی خەرجکردنی مووچەی فەرمانبەرانی هەرێمی کوردستان.
